ആ വിജയത്തിനു പിന്നിലും മഹി! താരങ്ങളുടെ ശമ്പളം ഏഴു കോടിയായി വര്‍ദ്ധിപ്പിച്ചതിനു പിന്നില്‍ ധോണി

Web Desk March 10, 2018

ക്രിക്കറ്റ് താരങ്ങളുടെ പുതിക്കിയ വേതന കരാറിന്റെ വിവരങ്ങള്‍ മുന്‍പ് വാര്‍ത്തയായിരുന്നു. വേതന സമ്പ്രദായത്തില്‍ അടിമുടി മാറ്റങ്ങളോടെയാണ് പുതിയ പട്ടിക പുറപ്പെടുവിച്ചത്. പട്ടികയില്‍ ചിലരെ ഉയര്‍ത്തുകയും താഴ്ത്തുകയും ഒഴിവാക്കുകയുമൊക്കെ ചെയ്തിരുന്നത് വലിയ ചോദ്യങ്ങള്‍ക്ക് വഴിവെച്ചിരുന്നു.

കഴിഞ്ഞ ബുധനാഴ്ചയാണ് ബിസിസിഐ ഇന്ത്യന്‍ താരങ്ങളുമായുള്ള കരാറില്‍ പുതിയ മാറ്റങ്ങള്‍ വരുത്തിയത്. പുതിയ നീക്കത്തോടെ ഇനി മുതല്‍ താരങ്ങളുമായുള്ള കരാറില്‍ എ പ്ലസ് കാറ്റഗറിയും ഉണ്ടാകും. ഈ കാറ്റഗറിയില്‍ ഉള്‍പ്പെടുന്ന താരങ്ങള്‍ക്ക് ലഭിക്കുന്ന വേതനം ഏഴു കോടിയായിരിക്കും. പക്ഷെ എ പ്ലസ് കാറ്റഗറിയില്‍ നിന്നും മുന്‍ ഇന്ത്യന്‍ നായകന്‍ എം.എസ്.ധോണിയെ ഒഴിവാക്കിയതിനെതിരെ ഏറെ ചോദ്യങ്ങള്‍ ഉയര്‍ന്നു വന്നിരുന്നു.

എ പ്ലസ് കാറ്റഗറിയില്‍ അഞ്ച് ഇന്ത്യന്‍ താരങ്ങളെയാണ് ഉള്‍പ്പെടുത്തിയിരിക്കുന്നത്. നായകന്‍ വിരാട് കോഹ്ലി, രോഹിത് ശര്‍മ്മ, ശിഖര്‍ ധവാന്‍, പേസര്‍ ഭുവനേശ്വര്‍ കുമാര്‍, ജസ്പ്രീത് ബുംറ എന്നിവരാണ് ഏഴ് കോടി ശമ്പളം വാങ്ങുന്ന ഇന്ത്യന്‍ താരങ്ങള്‍. പക്ഷെ ധോണിയെ പുറത്താക്കിയതിന് വ്യക്തമായ കാരണമുണ്ടെന്നാണ് ബിസിസിഐ അധികൃതര്‍ പറയുന്നത്.

‘വളരെ ലളിതമായ മാര്‍ഗ്ഗമാണ് ഇതിന് സെലക്ടര്‍മാര്‍ സ്വീകരിച്ചത്. കൂടുതല്‍ കളിക്കുന്നവര്‍ക്ക് കൂടുതല്‍ പണം എന്നതാണത്. ലിസ്റ്റിലെ അഞ്ച് പേരും മൂന്ന് ഫോര്‍മാറ്റും കളിക്കുന്നവരാണ്. അവര്‍ കൂടുതല്‍ വേതനം അര്‍ഹിക്കുന്നുണ്ട്. ധോണിയോടും കോഹ്ലിയോടും ശാസ്ത്രിയോടും ഈ കാര്യങ്ങള്‍ സംസാരിച്ചതുമാണ്.’ ബിസിസിഐ പറയുന്നു.

അതേസമയം, എ പ്ലസ് കാറ്റഗറി ധോണിയുടേയും കോഹ്ലിയുടേയും ആശയമായിരുന്നുവെന്നും അവര്‍ അതിനായി സമ്മര്‍ദ്ദം ചെലുത്തിയതായുമാണ് അറിയുന്നത്.

‘ചര്‍ച്ചക്കിടെ വിരാടും ധോണിയുമാണ് അങ്ങനൊരു ആശയം മുന്നോട്ട് വച്ചത്. ഈ കാറ്റഗറി വേണമെന്നും അര്‍ഹിക്കുന്നവര്‍ മാത്രമേ ഇതില്‍ പാടുള്ളൂ എന്നും ധോണിയും കോഹ്ലിയും പറഞ്ഞിരുന്നു. മൂന്ന് ഫോര്‍മാറ്റും കളിക്കുന്ന, ആദ്യ പത്ത് റാങ്കിങ്ങില്‍ വരുന്നവരെ തിരഞ്ഞെടുക്കുകയായിരുന്നു.’

എല്ലാ ഫോര്‍ഫാറ്റിലും കളിക്കുകയും മികച്ച പ്രകടനം പുറത്തെടുക്കുകയും ചെയ്യുന്നവര്‍ക്കു മാത്രമേ ഈ കാറ്റഗറിയില്‍ സ്ഥാനമുണ്ടാകൂ എന്നതാണ് ഇതിന്റെ സവിശേഷത എന്ന് ക്രിക് ഇന്‍ഫോയ്ക്ക് നല്‍കിയ അഭിമുഖത്തില്‍ വിനോദ് റായി പറയുന്നു. മുതിര്‍ന്ന താരമാണെങ്കിലും ടെസ്റ്റില്‍ നിന്നും വിരമിച്ചതോടെ ഈ കാറ്റഗറിയില്‍ നിന്നും ധോണി സ്വാഭാവികമായും പുറത്താവുകയായിരുന്നു.

തനിക്ക് സ്ഥാനമുണ്ടാകില്ലെന്ന് ഉറപ്പായിരുന്നിട്ടും മറ്റ് താരങ്ങള്‍ക്കായി ബിസിസിഐയോട് ആവശ്യപ്പെടുകയും അതിനായി പ്രയത്നിക്കുകയുമായിരുന്നു ധോണിയെന്നും അദ്ദേഹം പറയുന്നു. ധോണിയുടെ ഈ പെരുമാറ്റത്തിന് സോഷ്യല്‍ മീഡിയയും ആരാധകരും കയ്യടിക്കുകയാണ്.

Read more about:
EDITORS PICK
SPONSORED