മത്തി, മാങ്ങാ ഇട്ടു തേങ്ങാപ്പാല്‍ ചേര്‍ത്ത കറി

Pavithra Janardhanan October 20, 2020

ചോറും പപ്പടവും മീൻ കറിയും അൽപം മോരും പിന്നെ ഒരു മത്തി പൊരിച്ചതും. ആഹാ ഉച്ചക്കത്തെ ചോറിന് ഇതിനപ്പുറം എന്താണ് വേണ്ടത് അല്ലേ?അത്രമേൽ ബന്ധമാണ് മലയാളിക്കും മത്തിക്കും തമ്മിൽ.എങ്കിൽ ഇന്ന് മത്തി, മാങ്ങാ ഇട്ടു തേങ്ങാപ്പാല്‍ ചേര്‍ത്ത കറി തയ്യാറാക്കിയാലോ?
ആവശ്യമുള്ള സാധനങ്ങള്‍ :

മത്തി – 1 കിലോ
പുളിയുള്ള മാങ്ങ – 4 എണ്ണം ചെറിയ കഷണങ്ങള്‍ ആക്കിയത്
ചെറിയ ഉള്ളി അരിഞ്ഞത് – ½ കപ്പു
സവാള – 1 എണ്ണം
ഇഞ്ചി – 1 കഷണം
വെളുത്തുള്ളി – 1 തുടം
പച്ചമുളക് നീളത്തില്‍ കീറിയത് – 8 എണ്ണം
മുളക് പൊടി – 1 ടീസ്പൂണ്‍
മല്ലി പൊടി – 2 1/2 ടേബിള്‍ സ്പൂണ്‍
മഞ്ഞള്‍ പൊടി – 1/2 ടീ സ്പൂണ്‍
ഉലുവ – 1/2 ടീ സ്പൂണ്‍
തേങ്ങാ പാല്‍ പൊടി – 1 കപ്പു
വിനാഗിരി – 1 1/2 ടേബിള്‍ സ്പൂണ്‍

താളിക്കാന്‍ 

കടുക്
ഉലുവ – 1/2 ടീ സ്പൂണ്‍
വറ്റല്‍മുളക് – 2 എണ്ണം
കറിവേപ്പില
ചെറിയ ഉള്ളി – 4 എണ്ണം
വെളിച്ചെണ്ണ, ഉപ്പു – ആവശ്യത്തിനു

തയ്യാറാക്കുന്ന വിധം :

½ കപ്പു തേങ്ങാ പാല്‍ പൊടി വലിയ 1 കപ്പു ചെറു ചൂട് വെള്ളത്തില്‍ കലക്കി മാറ്റി വെക്കുക. ബാക്കിയുള്ള തേങ്ങാ പാല്‍ പൊടി കുറച്ചു വെള്ളത്തില്‍ കട്ടിയായി കലക്കി വെക്കുക.

മത്തി കഴുകി വൃത്തിയാക്കി കഷണങ്ങള്‍ ആക്കുക . അതില്‍ ഉപ്പു, 1 ടീസ്പൂണ്‍ മുളക് പൊടി, ഒരു നുള്ള് മഞ്ഞള്‍ പൊടി എന്നിവ പുരട്ടി അരമണിക്കൂര്‍ മൺകലത്തില്‍ മാറ്റി വെക്കുക.

ഫ്രയിംഗ് പാനില്‍ വെളിച്ചെണ്ണ ഒഴിച്ച് സവാള, ചെറിയ ഉള്ളി, ഇഞ്ചി, വെളുത്തുള്ളി, പച്ചമുളക് എന്നിവ ചേര്‍ത്തു വഴറ്റുക. അതിലേക്കു മല്ലിപ്പൊടി , ബാക്കിയിരിക്കുന്ന മഞ്ഞള്‍പ്പൊടി എന്നിവ ചേര്‍ത്തു നന്നായി വഴറ്റി യോജിപ്പിക്കുക. ഇതില്‍ മാറ്റിവെച്ചിരിക്കുന്ന കട്ടിയില്ലാത്ത തേങ്ങാപ്പാല്‍ ചേര്‍ത്തു തിളച്ചു കഴിയുമ്പോള്‍, മീന്‍ കഷണങ്ങള്‍ വെച്ചിരിക്കുന്ന മൺകലത്തിലേക്ക് ഒഴിച്ച് ഇളക്കി യോജിപ്പിക്കുക. ആവശ്യത്തിനു ഉപ്പു ചേര്‍ക്കുക.

ഒന്ന് തിളച്ചു കഴിയുമ്പോള്‍ മാങ്ങ ചേര്‍ത്തു മൂടി വെച്ച് നന്നായി വേവിക്കുക. കഷണങ്ങള്‍ വെന്തതിനു ശേഷം കട്ടിയുള്ള തേങ്ങാപ്പാല്‍ ഒഴിച്ച് വാങ്ങുക.

ഇതിലേക്ക് കടുക്, ഉലുവ, വറ്റല്‍മുളക്, കറിവേപ്പില, ചെറിയ ഉള്ളി, എന്നിവ താളിച്ച്‌ കറിയിലേക്ക് ഒഴിക്കുക. 5 മിനുട്ട് കഴിയുമ്പോള്‍ വിനാഗിരി ചേര്‍ത്തു കലം ഒന്ന് ചുറ്റിച്ചെടുക്കുക.

Read more about:
EDITORS PICK